Skip to content Skip to sidebar Skip to footer

Lawak Batak Kisah Lucu di Pulo Nias


Lawak Batak kali ini merupakan sebuah humor tentang kisah lucu para pekerja pembuatan jalan di pulo Nias. Meski sudah lama berlalu, kenangan yang terjadi beberapa puluh tahun silam masih terasa sangat lucu untuk diceritakan. Mungkin ada banyak kisah lain yang hampir mirip dengan pengalaman para pekerja ini, berikut ini salah satunya.

Kisah Lucu Di Pulo Nias

Taon 1988, karejo ma hami di Pulo Nias, mambahen dalan disi. Tingki i roa hian do dalan disi, haru motor Jeep maol mamolus mardomu sipata jambatan manaripari sunge so adong. Gumodang do hami sian Medan parkarejo, dang piga halak disi. Jala mansai maol dope hatiha i nasida marhata Indonesia, ingkon marhata nias do boi tung pe rap karejo hami. Songon i do nang angka na tading di hutahuta parbagasan olo do sahuta laos so adong naboi marhata Indonesia. Alana molo dung singkola naposo sai pintor mangaranto do i atik pe holan tamat SD sian huta.

Disada tingki adong ma mangoli halak disi na karejo rap dohot hami. Diundang ma hami tu pestana i. Torop do hami antong borhat sian Base Camp. Hami naro i adong do marugamo Silom, hape na mangoli i Karisten do. Jadi, jagal babi do dipatupa lompan, ipe holan dibolgang sambing do i. Alani tontu ingkon adong do lompan parsubang. Jagal manuk do dipatupa tu parsubang.

Dung sahat hami tu pesta i, pintor disukkun ma hasuhuton adong manang so adong dipatupa nasida sipanganon tu parsubang. Adong do ninna nasida.

Jumpang ma tingkina laho marsipanganon dung mulak penganten sian gareja manjalo pasupasu. Jongjong ma sada natuatua maniop mik panggogo soara. Hutanda hami do natuatua i ala rap karejo di proyek dalan i do hami. Jala huboto hami so diboto ibana marhata Indonesia. Alai huroha ala so adong be sipajoloon mandok hata dompak hami, marpala-pala ma ibana manggora hami.

“Bapa-bapa yang data dari Meda, kita mau maka. Yang maka seperti babi diruma Ama Fatona” ninna tung apala maol. Alai gabe longang hami boasa dohononna yang makan seperti Babi?

Dung i diuduti muse hatana
"Da yang maka seperti ayam di ruma Ama Joni” ninna.

Mengkel hami sude, alai dapot rohanami do pandokna na mandok yang makan seperti babi, mandok siallang jagal babi ma i jala yang makan seperti ayam mandok na so mangallang jagal babi ma i manang parsubang.

Alai dung sidung ma hami mangan laho mulak ma hami dung hujalang hami ma hasuhuton huhut mangalehon tumpak. Pintor adong ma dongan halak hita do alai parsubang ibana mamuhai mengkel.

“Boha do caramuna mangan nangkin, molo hami jolo marhais do asa martuduk. Molo hamu jolo mangugei do ate asa manjabjab” ninna ibana margak gogo.
Baca Juga: Cerita Lucu Marbadai Dibagasan Hakristenon
Hira koor gabungan hami rap mengkel sude satonga mate. Loja hami sude na mengkel i huhut maniop siubeonna be ala ergetna. Huingot hami hata ni amanta nangkin mandok “Yang makan seperti Babi di rumah Ama Fatona dan yang makan seperti ayam di rumah Ama Joni”.
Heffri Hutapea
Heffri Hutapea Hanya takutlah akan TUHAN dan setialah beribadah kepada-Nya dengan segenap hatimu, sebab ketahuilah, betapa besarnya hal-hal yang dilakukan-Nya di antara kamu.

Post a comment for "Lawak Batak Kisah Lucu di Pulo Nias"